विद्यालयको परिचय
विक्रम संवत् २००७ साल अघि नेपालमा राणाहरुले जहानीयँ शासन चलाएका थिए । १०४ बर्षे राण शासनमा शिक्षाको विकास हुन सकेन । जब, २००७ सालमा राणा शासनको अन्त्य र प्रजातन्त्रको प्रादुर्भाव भयो । प्रजातन्त्रको मिर्मिरेसँगै देशमा शैक्षिक विकासको लहर फैलिन थाल्यो । फैलिदो शैक्षिक विकासको लहरबाट प्रभावित भई मानेश्वाँरा तत्कालिन गाउँ पञ्चायत निवासी शिक्षाप्रेमीहरु जगत बहादुर लामा, ऋषिराम पौड्याल लगायतका महानुभावहरुको अगुवाईमा तत्कालिन मानेश्वाँरा गाउँ पञ्चायतको वडा नं ७ स्थित डाँडाखेत भन्ने ठाउँमा वि.स. २०१८ साल पौष १८ गत्ते श्री भद्रकाली पाठशालाको नामले विद्यालयको स्थापना भयो । यस पाठशालामो नाम भद्रकाली रहनुमा यसै साविक गा.वि.स को वडा नं २ (हाल बाह्रविसे न.पा. ८) मा अवस्थित भद्रकाली देविको नामबाट राखिएको देखिन्छ ।